မေးခိုင်ရောဂါ

  24-Feb-2017

---

Tetanus ကို မေးခိုင်ရောဂါဟု သုံးသည်။ ဤသို့ သုံးခြင်းမှာ Tetanus ရောဂါတွင် ထင်ရှားသော လက္ခဏာတစ်ခုဖြစ်သည့် Tetanus ကို တင်စား၍ ခေါ်ဆိုခြင်းဖြစ်သည်။ မေးခိုင်ရောဂါမှာ ဗက်တီးရီးယားကြောင့် ဖြစ်သောရောဂါဖြစ်သည်။ ဗက်တီးရီးယားအမည်မှာ Clostridium tetani ဖြစ်၏။ ဗက်တီးရီးယားမှာ Exotoxin အဆိပ်ပစ္စည်းထုတ်သည်။ ယင်းအဆိပ်ပစ္စည်းသည် ကြွက်သားများသို့သွားသော အာရုံကြောများနှင့် ကလာပ်စည်းများ (Motor nerve ending and motor nerve cells) အား ထိခိုက်စေသည်။

 

ကြွက်သားများသည် ကျုံ့ညှစ်ပြီး ပြန်ဆန့်နိုင်စွမ်း မရှိကြတော့ပေ။ အစားအစာဝါးရာတွင် သုံးသော ကြွက်သားများ ကျုံ့ညှစ်ပြီး ပြန်မဆန့်နိုင်ခြင်းကြောင့် ပါးစပ်မှာ စေ့နေပြီးဟမရ ဖြစ်သွားသည်။ သော့ခတ်ပြီး ဖွင့်မရသောသဘောဖြစ်သဖြင့် Lockjaw ဟု ခေါ်ပါသည်။ မျက်နှာရှိ အခြားကြွက်သားများလည်း ဖြစ်ပါသည်။ ခန္ဓာကိုယ်၏ အခြားနေရာများမှ ကြွက်သားများသည် မေးခိုင်ရောဂါ၏ အဆိပ်ကြောင့်ကျုံ့ညှစ်ပြီး ပြန်မဆန့်မှုဖြစ်နိုင်ပါသည်။ 

 

အသက်ရှူခြင်းနှင့်ဆိုင်သော ကြွက်သားများထိခိုက်မှုရှိလျှင် အသက်ရှူလုပ်ငန်းပျက်ယွင်းပြီး သေဆုံးသွားနိုင်ပါသည်။ နှလုံးကြွက်သားများ၏ ထူးခြားသော ဇီဝကမ္မဖြစ်စဉ်ကြောင့် မေးခိုင်ရောဂါကြောင့် နှလုံး၏ကျုံ့ခြင်း၊ ဆန့်ခြင်းအပေါ် ထိခိုက်မှုမရှိနိုင်ပါ။ ဝမ်းဗိုက်ကြွက်သားများသည်
မေးခိုင်ရောဂါကြောင့် ကျောက်သင်ပုန်း (သစ်သား) ကဲ့သို့ မာကျောနေတတ်ပါသည်။ Tetanus ရောဂါကို မေးခိုင်ဟုဆိုသော်လည်း ခန္ဓာကိုယ်အရိုးနှင့် ဆက်ထားသော ကြွက်သားများအားလုံး ထိခိုက်နိုင်သည်ဖြစ်ပါကြောင်း တင်ပြလိုက်ရသည်။

 

• မေးခိုင်ရောဂါသည် ခန္ဓာကိုယ်နေရာအနှံံအပြားရှိ အရိုးဆက်ကြွက်သားအားလုံးကို ထိခိုက်စေသည်။

 

Healthcare.com.mm သင့်ကျန်းမာရေး စောင့်ရှောက်ပေး
Credit:
ဒေါက်တာအေးကျော် (ဇီဝကမ္မဗေဒ)
ကျန်းမာရေးနှင့် ပတ်သက်သော အယူအဆအမှားများနှင့် သိမှတ်ဖွယ်ရာများမှ ကောက်နှုတ်ထားပါသည်။