ဝက်ခြံအကြောင်းပြောပြမယ်

မျက်နှာပေါ်မှာ ပေါက်နေတဲ့ ဝက်ခြံကိုကြည့်ပြီး အရေပြားဆရာဝန်တွေက လူနာရဲ့ ရောဂါကို ဟောကိန်းထုတ်ကြသလို တရုတ်တိုင်းရင်းသမားတော်တွေကလည်း မျက်နှာအသားအရေနဲ့ ဝက်ခြံကိုကြည့်ပြီး ဆေးကုသရာ ထိရောက်မှု ရှိတယ်လို့ ဆိုကြပါတယ်။ ဒါ Face Mapping ကုသနည်းလေးပါတဲ့။ မျက်နှာပေါ်က ဝက်ခြံအနေအထားကိုကြည့်ပြီး မိမိကျန်းမာရေးအခြေအနေကို တစေ့တစောင်း အကဲခတ်၍ ဝေဒနာကြီးကြီးမားမား မဖြစ်မီ ကြိုတင် ကာကွယ်ထားနိုင်ကြပါရန် အောက်ပါအတိုင်းမျှ ဝေလိုက်ရပါတယ်။

နှဖူးပြင်ပေါ်က ဝက်ခြံများ

ဆီးအိမ်နဲ့ အစာခြေ လမ်းကြောင်းပေါ်မှာ ပြဿနာတစ်ခုခု ရှိနေပါပြီ။ အဲဒီနေရာတွေမှာ မကြာခဏဆိုသလို ဝက်ခြံပေါက်ခဲ့ရင် ရေများများသောက်ပြီး အာဟာရပြည့်ဝတဲ့ အစားအစာတွေ ပိုစားပေးရပါမယ်။ (ဆေးသုတေသီတွေရဲ့ အဆို အမိန့်တွေအရ အမျိုးသမီးတွေမှာ အများဆုံးပေါက်လေ့ရှိတဲ့ နေရာဖြစ်ပါတယ်တဲ့။)

မျက်ခုံးမွှေး နှစ်ခု အလယ်တည့်တည့်က ဝက်ခြံများ

နားရွက် နှစ်ဖက်စလုံးကလည်း ဝဲ၊ ယာ ကျောက်ကပ်တွေနဲ့ ဆက်နွယ်မှု ရှိနေကြပါတယ်။ အကယ်၍ နားရွက်နှစ်ဖက်လုံးနီပြီး ပူထူနေတဲ့အခါ ခန္ဓာကိုယ် ထဲမှာ အဆိပ်အတောက်တွေ များလာပြီမို့ ရေသန့်များများ သောက်ပေးရပါမယ်။ အရက် ၊ ဆော်ဒါတွေအပြင် ကဖိန်းဓာတ် များပြားတဲ့ လက်ဖက်ရည်၊ ကော်ဖီတို့ကို လျော့သောက်ပေးရပါမယ်။

ပါးပေါ်က ဝက်ခြံများ

ပါးပြင်နှစ်ဖက်ကတော့ အသက်ရှူလမ်းကြောင်းနဲ့ သက်ဆိုင်နေပါတယ်တဲ့။ အသက်ရှူလမ်းကြောင်း ပိတ်ဆို့တဲ့ ဝေဒနာရှင်တွေ ၊ Allergic ဖြစ်သူတွေ ၊ အသက်ရှူလမ်းကြောင်းတစ်လျှောက် ဆံခြည်မျှင် သွေးကြောတွေ ပျက်စီးနေသူတွေနဲ့ ဆေးလိပ်စွဲသူတွေမှာ ပါးပေါ်ဝက်ခြံပေါက်လေ့ ရှိပါတယ်။ ပါးရဲ့ အောက်ခြေမှာ ဝက်ခြံပေါက်နေသူတွေက သွားဖုံးရောင်ဝေဒနာနဲ့ ဆက်စပ်မှု ရှိနေပြီမို့ သွားဆရာဝန်နဲ့ပြဖို့ လိုပါတယ်။

နှာခေါင်းပေါ်က ဝက်ခြံများ

နှာခေါင်းပတ်ဝန်းကျင်နဲ့ နှာတံတစ်လျှောက် ဝက်ခြံတွေက နှလုံးနဲ့ သွေးတိုးရောဂါဖြစ်ကြောင်းကို ညွှန်ပြပါတယ်။ လက်ရှိသုံးစွဲနေတဲ့ နှုတ်ခမ်းဆိုးဆေး၊ လိုင်နာတွေနဲ့ ဓာတ်မတည့်တဲ့အခါ ၊ နှာခေါင်းရဲ့ အောက်ခြေ သို့မဟုတ် အပေါ်နှုတ်ခမ်းရဲ့ အထက်ပိုင်းမှာ ဝက်ခြံထွက်လာတတ်လို့ နှုတ်ခမ်းဆိုးဆေး နောက်တစ်မျိုး ပြောင်းလဲဆိုးပေးသင့်ပါတယ်။

မျက်လုံးတစ်ဝိုက်ပေါ်က ဝက်ခြံများ

ကျောက်ကပ် ဝေဒနာသည်များက နားထင်နဲ့ မျက်လုံးပတ်ဝန်းကျင်တွေမှာ ဝက်ခြံထွက်လေ့ရှိကြပါတယ်တဲ့။ မျိုးရိုးဗီဇကြောင့် မျက်ကွင်းညိုသူတွေကို မဆိုလိုသော်လည်း ရံဖန်ရံခါ သို့မဟုတ် မျက်ကွင်းညိုတတ်သူတွေဟာ ခန္ဓာကိုယ်ထဲမှာ ရေဓာတ် ဆုံးရှူံးနေတာကို ဖော်ပြတာကြောင့် ရေများများသောက်ရင်း အရည်ရွှမ်းတဲ့ သစ်သီးတွေ စားပေးဖို့ လိုပါတယ်။

မေးစေ့ပေါ်က ဝက်ခြံများ

မေးစေ့နဲ့ မေးဖျားတစ်ဝိုက် ဝက်ခြံတွေက ခန္ဓာကိုယ်တွင်း ဟော်မုန်းတွေ ဖောက်ပြန်နေပြီ ဖြစ်ကြောင်းကို ဖော်ပြနေတာဖြစ်ပြီး ဓမ္မတာရာသီ လာခါနီးကာလတွေနဲ့ စိတ်ဖိစီးမှုများတဲ့ သူတွေမှာ ပေါက်လေ့ရှိပါတယ်။ ဒါ့အပြင် ဝမ်းချုပ်သူတွေနဲ့ ခန္ဓာကိုယ်တွင်း အပူအပုပ်များသူတွေလည်း မေးစေ့ပေါ်မှာ ဝက်ခြံပေါက်တတ်တာမို့ အမျှင်ဓာတ်များတဲ့ အစားအစာတွေ များများစားပေးသင့်ပါတယ်။

အောက်နှုတ်ခမ်း(သွားရည်စီးကြောင်းတစ်လျှောက်) နှင့် မေးရိုးပေါ်က ဝက်ခြံများ

ဟော်မုန်းမညီမျှသူတွေမှာလည်း အဲဒီလိုနေရာတွေမှာ ဝက်ခြံပေါက်တတ်ပြီး သွားပိုးစားသူတွေ၊ ခံတွင်းပုပ်သူတွေ ၊ ခံတွင်းရောဂါ အမျိုးမျိုးနဲ့ ဆက်စပ်နေတာဖြစ်လို့ မပေါ့ဆသင့်ပါဘူး။ နီးစပ်ရာသွားဆရာဝန်နဲ့ အမြန်ဆုံး ကုသမှု ခံယူသင့်ပါပြီ။

လည်ပင်းတွေ နီမြန်းနေခြင်း

အအေးမိ၊ နှာစေး စတဲ့ ရာသီဖျားနာ တုပ်ကွေးပိုးတွေ ကူးစက်ခံရတဲ့အခါ လည်ပင်းတွေ နီမြန်းလာတတ်ပါတယ်။ အဲဒီအခါမျိုးမှာ အာဟာရပြည့်ဝတဲ့ အစားအစာတွေစားရင်း ကောင်းကောင်းအနားယူပါ။ နေပူထဲ လုံးဝမထွက်ဘဲ ရေများများသောက်ဖို့လဲ အထူးလိုအပ်ပါတယ်။

Credit : သက်တန့်ချို