မျက်စိမြင်ကွင်း တစ်ခြမ်းကွယ်ခြင်း

ကျွန်တော်ဆေးခန်းအတွင်းသို့ အသက် ၆၀ ဝန်းကျင်ရှိ လူနာတစ်ယောက် မျက်စိဝေဒနာပြရန် ဝင်လာပါသည်။

          “လာ၊ ထိုင်ပါ။ မျက်စိ ဘယ်လို ဒုက္ခပေးနေလို့လဲ”

          “ကျွန်တော် မျက်မှန် ဘယ်လိုမှ ကြည့်မကောင်းလို့ပါ။ မျက်မှန်အသစ် လဲတာကလည်း ခုရက်ပိုင်းမှာတင် သုံးကြိမ်ရှိပါပြီ။ ကြည့်လို့ ဘယ်လိုမှ မရပါဘူး။ အခုဆိုရင် အကြောဆေးတောင် ထိုးလို့မရ ဖြစ်နေတယ်။ ကျွန်တော် မျက်မှန်စမ်းထားတဲ့ စာရွက်တွေလည်း ပါ ပါတယ်။ ဆရာကြီး ကြည့်ပါဦး။”

          စမ်းသပ်ထားပြီး မျက်မှန်ညွှန်းသည့် စာရွက်သုံးရွက်ကို အိတ်ထဲမှ ထုတ်ပေးပါသည်။ မျက်မှန်ညွှန်းသည့် စာရွက်တွင် လက်မှတ်ထိုးထားသည့် မျက်စိအထူးကု ဆရာဝန်ကြီးများကလည်း စာတစ်စောင်တွင် တစ်ယောက်စီ ထိုးထားတာ ဖြစ်ပါသည်။ မျက်စိဆေးခန်းကြီးသုံးခုမှာ မျက်စိဆရာဝန်ကြီးတစ်ယောက်စီ လှည့်ပြလာတာ ဖြစ်ပါသည်။ မျက်မှန်ညွှန်းတဲ့ စာရွက်မှာ ညွှန်းထားသော မျက်မှန်ပါဝါကလည်း တစ်စောင်နဲ့ တစ်စောင် သိပ်မကွာကြပါ။

          နောက်ဆုံးလုပ်ထားသည့် မျက်မှန်နှင့် မြင်နိုင်စွမ်းအားကို စမ်းသပ်ကြည့်သည့်အချိန်တွင် ညာဘက်မျက်စိအနေနှင့် စာငါးလုံးပါ အတန်းထိ ဖတ်ပြနိုင်ပြီး ဘယ်ဘက်မျက်စိအနေက စာခြောက်လုံးပါသည့် စာတန်းအထိ ဖတ်ပြနိုင်ပါသည်။

          “မျက်မှန်လည်း သုံးနေရာ စမ်းသပ်ခဲ့ပြီ။ မျက်မှန်ညွှန်းထားတဲ့ ပါဝါတွေ အနေနဲ့ကလည်း တစ်စောင်နဲ့တစ်စောင် သိပ်မကွာကြဘူးဆိုတော့ အခု မျက်စိကြည့်မကောင်းတာဟာ မျက်မှန်ပါဝါကြောင့်တော့ ဟုတ်မယ်မထင်ဘူး။ မျက်စိနဲ့ ပတ်သက်တဲ့ ဘာရောဂါတွေရှိနေလို့ မျက်စိကြည့်မကောင်းတာလဲဆိုတာကိုပဲ အဓိကထားပြီး စစ်ဆေးကြည့်ပါမယ်။”

“ဆရာကြီး ကောင်းသလိုသာ လုပ်ပါ” ဟုဆိုသည်။

          ကျွန်တော် မျက်စိနှစ်ဖက်လုံး၏ ရှေ့ဘက်ပိုင်းကို မျက်စိစစ်ဆေးသည့် အဏုကြည့်မှန်ဘီလူးနှင့် စမ်းသပ်ကြည့်ရှူ့စစ်ဆေးပါသည်။ မျက်စိနှစ်ဘက်လုံးသည် အတွင်းတိမ် အနည်းငယ်စနေသည်ကလွဲ၍ မျက်စိ၏ ရှေ့ဘက်ပိုင်းတွင် ရောဂါတစ်စုံတစ်ရာ မတွေ့ရပါ။ မျက်စိ၏ နောက်ဘက်ပိုင်းကို သူငယ်အိမ်ကျယ်စေသည့် မျက်စဉ်းထည့်ပြီး ကြည့်ရှုပါသည်။ အမြင်အာရုံခံလွှာ Retina အနေနှင့် အားလုံးကောင်းမွန်နေပြီး အမြင်ဆိုင်ရာ အာရုံကြောမကြီး၏ ထိပ် (Optic Disc) ကတော့ နည်းနည်း ပိုခွက်နေသကဲ့သို့ မြင်ရပါသည်။ ထိုကြောင့် ရေတိမ်များ ဖြစ်နိုင်မလားဆိုပြီး ရေချိန်လည်း ပုံမှန်အနေအထားရှိပါသည်။

          ပိုမိုသေချာအောင် နောက်ဆုံးပေါ် OCT နည်းပညာဖြင့် အမြင်ဆိုင်ရာ အာရုံကြောမကြီး၏ ထိပ်ကို ဓာတ်ပုံရိုက်ရန်နှင့် မျက်စိနှစ်လုံးရဲ့ မြင်ကွင်း (Visual Field) အခြေအနေကို စမ်းသပ်ရန် မျက်စိဆေးခန်းကြီးတစ်ခုသို့ စေလွှတ် လိုက်ပါသည်။

          အမြင်ဆိုင်ရာအာရုံကြောမကြီးကို ရိုက်တဲ့ OCT ပုံအနေနဲ့ သာမန်ထက် အနည်းငယ် ပိုခွက်နေသည်ကလွဲပြီး ရေတိမ်ရောဂါလက္ခဏာ မတွေ့ရှိရပါ။ မျက်စိမြင်ကွင်းပုံများကတော့ မျက်စိနှစ်ဖက်စလုံး၏ ညာဘက်တစ်ခြမ်းစီ ကွယ်နေတာကို တွေ့ရပါတယ်။

“မျက်စိနှစ်ဖက်စလုံးရဲ့ မြင်ကွင်းမှာ ညာဘက်အခြမ်းတွေ ကွယ်နေတာ တွေ့ရတယ်”

“အဲဒီလို မြင်ကွင်းတစ်ခြမ်းကွယ်တဲ့ အကြောင်းတွေက အမြင်အာရုံခံလွှာ Retina မှ ဦးနှောက်ရဲ့ အမြင်ဆိုင်ရာလုပ်ငန်းတွေကို ထိန်းချုပ်ရာဌာန Visual Centre အကြား တစ်နေရာရာမှာ ရောဂါတစ်ခုခုကြောင့် ဆက်သွယ်ရေးလမ်းကြောင်း ပြတ်တောက်နေလို့ ဖြစ်ပါတယ်။”

          “မြင်ကွင်းတစ်ခြမ်းကွယ်တဲ့ ပုံစံတွေကလည်း အမျိုးမျိုးရှိပါတယ်။ မျက်စိတစ်ဖက်တည်းမှာ မြင်ကွင်း ကွယ်တာလား၊ နှစ်ဖက်လုံးမှာ ကွယ်တာလား၊ မြင်ကွင်းဘယ်လိုပုံစံကွယ်ရင် ဘယ်နေရာမှာ ဆက်သွယ်ရေး ပြတ်တောက်တယ်ဆိုတာ ခန့်မှန်းတွက်ချက်ယူလို့ ရပါတယ်”

          “မျက်စိမြင်ကွင်း ကွယ်တာက မျက်စိနှစ်ဖက်လုံးရဲ့ ညာဘက်အခြမ်းမှာ ကွယ်နေတာ ဖြစ်ပါတယ်။ အဲဒီလို မျက်စိနှစ်ဖက်ရဲ့ မြင်ကွင်းဟာ ပုံစံတူ၊ ဖက်တူ မျက်စိနှစ်ဖက်စလုံးရဲ့ ညာဘက် တစ်ခြမ်း ကွယ်နေတာကို Right Homonymous Hemianopia လို့ ခေါ်ပါတယ်။

          အဲဒီ မြင်ကွင်းကွယ်တဲ့ပုံ အလိုအရဆိုရင် ဦးနှောက်ရဲ့ ဘယ်ဘက်အခြမ်း နားထင်နားတစ်ဝိုက်မှာ တစ်ခုခုချို့ယွင်းပြီး အမြင်ဆိုင်ရာ ဆက်သွယ်ရေးလမ်းကြောင်း ပြတ်တောက်နေတဲ့ပုံ ဖြစ်ပါတယ်။

          ဘာကြောင့် ဖြစ်သလဲဆိုတာကတော့ CT Scan ရိုက်ပြီးမှ ဘာကြောင့်ဖြစ်တယ်ဆိုတာကို ပြောလို့ရနိုင်မှာပါ။ အခု အခြေအနေကို ခန့်မှန်းတွက်ဆရရင်တော့ ဦးနှောက်နဲ့ ပတ်သက်တဲ့ ရောဂါလက္ခဏာတစ်ခုမျှမရှိဘဲ မြင်ကွင်းတစ်ခြမ်း ကွယ်တာတစ်ခုပဲ ရှိနေတာဆိုတော့ အမြင်ဆိုင်ရာ သတင်းပေးပို့တဲ့ လမ်းကြောင်းတစ်လျှောက်ရဲ့ ဘယ်ဘက်နားထင်နား တစ်နေရာရာမှာ သွေးကြောကျဉ်းနေလို့ ဖြစ်နိုင်ပါတယ်။ အခုဟာက မျက်စိမြင်ကွင်းရဲ့ အခြေအနေကိုကြည့်ပြီး ကျွန်တော်ခန့်မှန်းပြောတာပါ။

          ဦးနှောက်နဲ့ အာရုံကြောဆိုင်ရာ သမားတော်ကြီးတစ်ဦးဦးနဲ့ ဆက်လက်ပြသရပါမယ်။ သူ့အနေနဲ့ CT စတဲ့ စမ်းသပ်စစ်ဆေးမှုတွေ ပြုလုပ်ပြီးရင် ရောဂါ ဘာကြောင့် ဖြစ်တယ်။ ဘယ်နေရာမှာ ဖြစ်တယ်ဆိုတာ သိရမှာ ပါ။ မျက်စိအခြေအနေကိုတော့ ရံဖန်ရံခါ ပြန်စစ်ဆေးပေးပါ့မယ်။”

         လူနာ ကျွန်တော့ကို နှုတ်ဆက်ပြီး ဆေးခန်းမှ ပြန်ထွက်သွားပါသည်။ ကျွန်တော့ဆေးခန်းမှ ထွက်ခွာသွားပြီး ထိုနေ့တွင်ပင် ဦးနှောက်နှင့် အာရုံကြောအထူးကု ဆရာဝန်မကြီး၏ ဆေးခန်းသို့ ဝင်ရောက်ပြသပါသည်။ ဆရာဝန်မကြီးမှလည်း နောက်နေ့နံနက်တွင် ရန်ကုန်ဆေးရုံကြီး ဦးနှောက်နှင့် အာရုံကြောဌာနသို့ ဆေးရုံတင်ပြီး လိုအပ်သည့် စမ်းသပ်မှု၊ ဆေးဝါးကုသမှုများကို ပြုလုပ်ပေးပါသည်။

          ထိုလူနာဆရာဝန်၏ အခြေအနေများကို မိသားစုမှ ကျွန်တော့ဆီ ပုံမှန်သတင်းပို့ပါသည်။ လူနာသည် ဆေးရုံတက်နေစဉ်ကာလတွင်ပဲ တစ်နေ့ထက်တစ်နေ့ အခြေအနေတွေ ပိုမိုဆိုးဝါးလာပြီး ဦးနှောက်နှင့် အာရုံကြောရောဂါဆိုင်ရာ ရောဂါလက္ခဏာများ ပိုမိုပေါ်ပေါက်လာပါသည်။

          ထို့နောက် တဖြည်းဖြည်းနှင့် အစာလုံးဝ မမျိုနိုင်တော့ဘဲ ပိုက်နှင့် သွင်းရသည့်အခြေအနေသို့ ရောက်ရှိလာပြီး ဆေးရုံမှတောင် ပြန်မဆင်းရတော့ဘဲ ခြောက်လခန့်အကြာတွင် ကွယ်လွန်သွားပါသည်။

          ဤနေရာတွင် ကျွန်တော့အနေဖြင့် အများပြည်သူများအား တင်ပြလိုသည့်အချက်တစ်ခု ရှိပါသည်။ ထိုသတင်းအချက်အလက်မှာ မျက်စိနှင့် ပတ်သက်သည့် ကင်ဆာရောဂါများမှအပ တခြား မျက်စိရောဂါများသည် အသက်အတွက် မည်သို့မျှ အန္တရာယ်မဖြစ်နိုင်ဟု ထင်မြင်နိုင်သော်လည်း အသက်ကို အန္တရာယ်ဖြစ်စေနိုင်သည့် ရောဂါတချို့၏ ပထမဆုံး ပေါ်ပေါက်လာသည့် ရောဂါလက္ခဏာသည် မျက်စိတွင် စတင်ပေါ်ပေါက်လာနိုင်သည်ဆိုသည့် အချက်ဖြစ်ပါသည်။

Credit : ဒေါက်တာ မင်းသိမ်း