သင့်အရေပြားအကြောင်းဘယ်လိုအကဲဖြတ်မလဲ

  25-Feb-2017

---

သင့်အရေပြားအကြောင်းဘယ်လိုအကဲဖြတ်မလဲ
သင့်အရေပြားကျန်းမာမှုရှိ၊ မရှိ သိရှိနိုင်ဖို့ မနက်အိပ်ရာထ၊ မျက်နှာသစ်ပြီးတဲ့အခါ မှန်ကြည့်ပါ။ အရေပြားပေါ်အကွက်တွေ၊ အဖုအပိမ့်တွေ မရှိစေရုံသာမကဘဲ ကျန်းမာ
ကြောင်း အတည်ပြုနိုင်တဲ့ အချက်တွေရှိနေပါသေးတယ်။ 

၁။ အသားအရောင်

ညီညာသောအသားအရောင်ရှိသူက အသားဖြူသူ၊ အသားညိုသူတွေထက် ပိုပြီး ဆွဲဆောင်မှုရှိပါတယ်။ ဒါတင်မကသေးဘဲ အသားအရောင် ညီညာတာက သင့်အရေပြား ကျန်းမာတယ် ဆိုတာကိုလည်း သက်သေပြပါတယ်။ 

အသားအရောင်ကို ပျက်စီးစေသည်များ -

• အနီအစက်များ၊ အမည်းစက်များ၊
• အသားအရောင်ဖျော့သော အကွက်များ၊
• မျက်ကွင်းညိုုခြင်း။

၂။ အသားအရေ

ချောမွေ့ညီညာတဲ့ အသားအရေက သင့်အရေပြားကျန်းမာ တယ်ဆိုတာကို ပြဆို ပါတယ်။ ချောမွေ့တယ်ဆိုရာမှာ မှန်သားပြင်ကဲ့သို့ ချောမွေ့ညီညာနေတာမျိုးကို ဆိုလိုတာ မဟုတ်ပါဘူး။ သင့်အရေပြားပေါ်မှာ မွေးညှင်းပေါက်လေး ရှိနေတဲ့နေရာတွေဟာ အနည်းငယ်ချိုင့်ဝင်နေပြီး သူ့ဘေးတစ်ဝိုက်က အနည်းငယ်ဖောင်းသယောင် ဖြစ်နေ ပါတယ်။ မှန်မှာ အနီးကပ်ကြည့်မယ်ဆို မြင်တွေ့နိုင်ပါတယ်။

အသားအရေကိုပျက်စီးစေသည်များ-

• ပါးရေတွန့်ခြင်း၊ အမာရွတ်များရှိခြင်း
• ဝက်ခြံများရှိခြင်း
• အဖုအပိမ့်များရှိခြင်း

၃။ အာရုံခံစားမှု

ကျန်းမာတဲ့ သင့်အရေပြားမှာ ထူးခြားတဲ့ အာရုံခံစားမှုတွေကို သတိမထားမိနိုင် တာကြောင့် မသိရှိနိုင်ပါဘူး။ အရေပြားက ကျန်းမာနေတာကြောင့် အနာဘယကင်းရှင်းပြီး တခြားခံစားမှုတွေ မရှိရတာပါ။ သင့်အရေပြားသာ ကျန်းမာမှုမရှိပါက သင့်ကို 
စိတ်အနှောက်အယှက်ဖြစ်စေတဲ့ ခံစားမှုတွေကို ဖြစ်ပေါ်စေပါတယ်။

အာရုံခံစားမှုဖြစ်ပေါ်စေသည်များ -

• အရေပြားယားယံခြင်း
• ပူလောင်သော ခံစားမှုခံစားရခြင်း
• တဆစ်ဆစ် စူးပြီးနာခြင်း

၄။ ရေဓာတ်

အရေပြားခြောက်သွေ့ပြီး ကွာကျမှုတွေရှိနေပါက ရေဓာတ်မပြည့်ဝမှုတွေ ရှိနေ တာကြောင့် သင့်အရေပြားက ရေဓာတ်မပြည့်ဝလို့ဆိုတာ သိနိုင်ပါတယ်။ ဆဲလ်တွေ တစ်ခုချင်းကွာကျနေတာကို မမြင်နိုင်ပေမယ့် ရေဓာတ်လိုအပ်တာကြောင့် ဆဲလ်တွေ အစုလိုက်ကွာကျမယ်ဆိုရင်တော့ သင့်မျက်စိနှင့် မြင်တွေ့နိုင်ပါတယ်။

ရေဓာတ်လိုအပ်မှုကြောင့် ဖြစ်စေသည်များ -

• အရေပြားခြောက်သွေ့ကွဲအက်ခြင်း
• အရေပြားအလွှာလိုက်ကွာကျခြင်း

Healthcare.com.mm သင့်ကျန်းမာရေး စောင့်ရှောက်ပေး
Credit:
ပန်းနွယ်လေး (ဆေးဝါးတက္ကသိုလ်)
Good Health Journal